A próxima apertura da Casa do Patín, que acollerá un telecentro e ofertará, entre outros, os servizos que ata o momento se prestaban na aula de informática municipal, deixou baleiro este último espazo ubicado na avenida do Mazote –os dez equipos informáticos xa foron trasladados á Casa do Patín a semana pasada, sumándose aos trece da nova aula multimedia-. Precisamente esta mesma mañá procedeuse ao traslado do mobiliario e material necesario para impartir os “Divertixogos” na antiga aula de informática, modificando a ubicación que tiña esta actividade ata o momento, na Aula de Diversificación do CPI Conde de Fenosa.
Os “Divertixogos”, dirixidos a nenos e nenas de tres a sete anos, comezarán o vindeiro luns, día 4 de outubro, e forman parte das escolas culturais para o presente curso promovidas pola Concellaría de Cultura, que preside a edil socialista Ana Fernández Coira.