A empresa Begasucegsa será a encargada de executar as obras de abastecemento das Pezoas, Curmá e Mazaído, na parroquia aresá de Caamouco. A Consellería de Medio Rural, a petición do grupo de goberno local, financiará estes traballos, adxudicados á compañía anteriormente mencionada o pasado mes de agosto por un importe de 50.139,63 euros.
O prazo de execución desta actuación é de tres meses e o seu inicio producirase en cuestión de días, unha vez que se asine a acta de replanteo. Deste xeito, agárdase que os traballos de abastecemento nestes tres lugares do municipio de Ares estean rematados antes de decembro deste ano.