O Concello de Ares, a través da área de Obras e Servizos, que dirixe o socialista José Ferreiro, executou a pasada semana unha intervención moi demandada ao longo dos anos polos veciños deste municipio. En concreto, trátase da instalación de alumeado público no tramo da estrada de Franza que une o municipio de Mugardos coa entrada á vila de Ares.
A actuación, consistente na colocación de 15 puntos de luz, afecta a uns 600 metros, que durante moito tempo non tiveron alumeado. En consecuencia, a iniciativa desenvolvida polo Concello persegue, por unha banda, seguir dotando a todo o municipio dos servizos que precisa, e por outra, incrementar a seguridade viaria, tanto dos vehículos que cada día transitan por dita estrada, como dos propios peóns.